1.     Intangiriro

Gukurikirana iyubahirizwa ry’ihamer ry'uburinganire n’ubwuzuzanye hagati y’abagore n’abagabo ni imwe mu nshingano z’ibanze z’Urwego rw’Igihugu rushinzwe Gukurikirana Iyubahirizwa ry’Uburinganire n’Ubwuzuzanye hagati y’’Abagore n’Abagabo mu iterambere ry’Igihugu (GMO). Uru rwego rukurikirana uko amahame y’uburinganire yubahirizwa mu nzego zose zirimo iza Leta, iz’abikorera, imiryango itari iya Leta ndetse n’imiryango ishingiye ku madini.

Urwego rugenzura uko Politiki y’Igihugu y’Uburinganire ishyirwa mu bikorwa mu nzego zitandukanye z’iterambere ry’igihugu. urwego rugenzura uko amasezerano n’ibyemezo byo ku rwego rw’akarere ndetse n’amahanga u Rwanda rwemeje bijyanye n’uburinganire bishyirwa mu mategeko y’igihugu, bishyirwa mu bikorwa ndetse n’uko bitangwaho raporo.

2.  Uburyo bwo gukurikirana ishyirwa mu bikorwa no kubaza inshingano

Mu rwego rwo kugenzura uko ihame ry’uburinganire n’ubwuzuzanye rikorwa mu nzego zose. Urwego rukoresha uburyo butandukanye burimo:

2.1.Gushyiraho uburyo bwo gupima iterambere mu buringanire

• Gutegura ibipimo by’uburinganire n’imibare fatizo 

• Gutegura uburyo bwo gukurikirana no gusuzuma ibikorwa by’uburinganire

• Gutegura uburyo bw’ibarurishamibare rijyanye n’uburinganire

2.2.Gukora isuzuma n’ubugenzuzi ku buringanire

• Gukora igenzura ry’uburinganire rishingiye ku bufatanye bw’abafatanyabikorwa

• Gukora isuzuma ry’ishyirwa mu bikorwa ry’ingengo y’imari yimakaza ihame ry’uburinganire 

2.3.Gutanga ibimenyetso bishingiye ku makuru n’ubushakashatsi

• Gusesengura amategeko, politiki n’ingamba zitandukanye

• Gukora ubushakashatsi no gusakaza ibyavuyemo

• Gutegura inyandiko zigaragaza uko uburinganire buhagaze mu nzego zitandukanye 

• Gutegura inyandiko zifasha abafata ibyemezo ndetse n’inyandiko zisesengura ibibazo byihariye bijyanye n’uburinganire

3.     Ibyagezweho mu kugenzura iyubahirizwa ry’Ihame ry’uburinganire

Mu rwego rwo gushyira mu bikorwa inshingano zo gukurikirana iyubahirizwa ry’uburinganire n’ubwuzuzanye bw’abagore n’abagabo mu nzego zose, GMO imaze kugera ku bikorwa bitandukanye birimo:

a.  Guteza imbere umucoo wo kubazwa  inshingano mu kwimakaza ihame ry’uringanire: 

GMO yakoranye n’inzego za Leta, iz’abikorera, imiryango itari iya Leta ndetse n’imiryango ishingiye ku myemerere hagamijwe kongerera ubushobozi n’imyumvire y’ibyo bigo ku mahame y’uburinganire ndetse no kubaka umuco wo kubazwa inshingano mu kwimakaza uburinganire.

b.  Gukora  inyandiko zigaragaza ishusho ry’ihame ry’Uburinganire:

GMO yakoze inyandiko zigaragaza ishusho ku ihame ry’uburinganire mu nzego zitandukanye( Uturere 25 ndetse n’inzego z’iterambere zirimo ibikorwa remezo, ubuhinzi, uburezi ,serivisi z’imari, ndetse n’ikoranabuhanga. Izo nyandiko zigaragaza intambwe imaze guterwa mu guteza imbere ihame ry’uburinganire, imikorere myiza ndetse n’imbogamizi mu kwimakaza ihame  ry’uburinganire ,kugirango hakorwe  ubuvugizi bushingiye ku makuru yagaragajwe mu gufata ibyemezo.

c. Imikoranire n’Inzego zitandukanye: 

GMO yubatse ubufatanye n’inzego za zitandukanye harimo: iza Leta, iz’abikorera ,imiryango itari iya leta, imiryango yegamiye ku madini ndetse n’abafatanyabikorwa mu iterambere. Ubu bufatanye bwagize uruhare mu gutegura gahunda zihuriweho, ikurikiranabikorwa, gukora ubuvugizi bugamije guteza imbere umuco wo kubazwa inshingano ku kwimakaza ihame ry’uburinganire n’ubwuzuzanye mu nzego zitandukanye.

d. Kugira uruhare mu ivugurura ry’Amategeko na Politiki hagamijwe kw’imakaza ihame ry’uburinganire 

GMO yagize uruhare mu gufatanya n’inzego mu gusuzuma no kuvugurura amategeko na politiki zitandukanye zirimo: Itegeko riteganya ibyaha n’ibihano muri rusange, Itegeko rigenga abantu n’umuryango, itegeko rigenga ikiruhuko cyo kubyara, itegeko rigenga umurimo mu Rwanda,Politiki y’Uburezi bw’Abakobwa, itegeko rigena imucungire y’imari ya Leta na Politiki y’uburezi bw’umukobwa hagamijwe ko byose  byubahiriza amahame y’uburinganire.