Minisitiri w’Uburinganire n’Iterambere ry’Umuryango, Uwimana Consolée, yibukije abayobozi n’abafatanyabikorwa bo mu Mujyi wa Kigali ko ubushake n’ubwitange bwabo ari bwo shingiro ry’umuryango utekanye, nk’uko u Rwanda rubyifuza.
Ibi yabigarutseho ku wa Gatatu, tariki ya 10 Ukuboza 2025, mu nama mpuzabikorwa yahuje uturere tw’Umujyi wa Kigali n’abafatanyabikorwa bawo, baganira ku rwego rw’iterambere ry’umuryango n’ingamba zo gukemura ibibazo bikibangamiye umuryango mu buryo burambye. Iyi nama kandi yahuye no gusoza icyumweru cyahariwe kwimakaza ihame ry’uburinganire ndetse n’iminsi 16 y’ubukangurambaga bwo kurwanya ihohotera rishingiye ku gitsina.

Ibyagezweho mu cyumweru cyahariwe cy’uburinganiremumujyi wa Kigali 
Mu kugaragaza intambwe yatewe mu kwimakaza ihame ry’uburinganire, hatangajwe ibyakozwe birimo:
•Abana 47 banditswe mu bitabo by’irangamimerere;
•Imiryango 38 yasezeranye imbere y’amategeko;
•Abakozi 60 bahawe ubumenyi ku igenamigambi ryubahiriza ihame ry’uburinganire (Gender Responsive budgeting and Planing GRB)
•Abangavu 144 bahawe serivisi zitandukanye zirimo izirebana n’imirire, ubuzima bw’imyororokere n’ubugenzacyaha;
•Ababyeyi b’abangavu 174 bitabiriye ibiganiro bigamije kubungabunga uburere bw’umwana no guhabwa serivisi zo kuboneza urubyaro.

Uruhare rw’abayobozi mu kubaka umuryango utekanye

Umuyobozi w’Akarere ka Ruhango, Habarurema Valens, n’Umukuru w’Umudugudu wa Yogoro mu Murenge wa Kabagari, basangije abitabiriye inama uko bubatse imiyoborere ishyira imbere umuturage. Bagaragaje uburyo mu Karere ka Ruhango batangije ishuri ry’abayobozi rifasha kubaka imikorere inoze, ihatana kandi igamije intsinzi.

Umuyobozi w'Akarere ka Ruhango Hbarurema Valenss ibumosoz n'Umukuru w'Umudugudu wa Yogoro Iburyo

Bashimangiye ko ubushake bw’umuyobozi ari bwo butuma aho ayobora hatekana, bityo basaba ko iyi myitwarire ikomeza kwitabwaho mu nzego zose.
Gukomeza gushyira imbaraga mu kurwanya ihohotera

Umugenzuzi Mukuru w’Uburinganire, Umutoni Gatsinzi Nadine

Umugenzuzi Mukuru w’Uburinganire, Umutoni Gatsinzi Nadine, yasabye inzego zitandukanye gukomeza kunoza no gukurikirana imikorere ya Isange One Stop Center, nk’imwe mu nzira z’ingenzi igihugu cyashyizeho mu gufasha abahuye n’ihohoterwa kugira ngo basubire mu buzima busanzwe.
Ubutumwa bwa Minisitiri Uwimana Consolée

Minisitiri w'Uburinganire n'Iterambere ry'Umuryango

Mu gusoza inama, Minisitiri Uwimana Consolée yasabye abayobozi bose kurushaho kunoza imikorere no gukorera mu bufatanye bufite icyerekezo. Yibukije ko imbaraga za buri muyobozi n’umukozi ari ingenzi mu gukumira no kurwanya ihohotera iryo ari ryo ryose ribangamira umuryango. Yanashimangiye ko kubaka umuryango ushoboye, wubahiriza ihame ry’uburinganire kandi utekanye bisaba uruhare rwa buri wese ku nshingano ze za buri munsi. Yarangije asaba ko ubutumwa bwatanzwe butajya mu mpapuro gusa, ahubwo bugashyirwa mu bikorwa mu nyungu z’igihugu n’abaturage.