Kuwa Kabiri tariki ya   9 Nzeri 2025, Mu nteko y’Abaturage yabereye mu murenge wa Nyamiramo , mu Karere ka Kayonza habereye ibirori byo gutangiza  icyumweru cyahariwe kwimakaza ihame ry’Uburinganire mu turere twose tugize iyi Ntara. Iki Cyumweru gifite insanganyamatsiko igira iti: “Ihame ry’uburinganire, inkingi y’imiyoborere myiza n’iterambere ridaheza kandi rirambye.”
Gutangiza iki cyumweru ku rwego rw’Intara,byitabiriwe na Guverineri Intara y’Iburasirazuba, Bwana Pudence Rubingisa,Umugenzuzi Mukuru w’Uburinganire, Madamu Umutoni Gatsinzi Nadibe , Meya w’Akarere ka Kayonza,Bwana Bosco Nyemazi, abahagarariye inzego z’umutekano , abafatanyabikorwa batandukanye , abaturage ndetse nabagize imiryango 47 yasezeranye mu buryo bwemewe n’amategeko.

Imiryango 47 yiyemeje kubana mu buryo bwemewe n'amategeko mu Murenge wa Nyamirama.

Kuva ku wa 09-19 Nzeri 2025 hazakorwa ibikorwa bitandukanye birimo:
•Gusezeranya imiryango ibana itarasezeranye imbere y'amategeko.
•Gutanga ubujyanama ku miryango ibana mu makimbirane.
•Kwandika abana no gutanga izindi serivisi z’irangamimerere,
•Ibiganiro n’abayobozi n’abakozi b’Uturere n’imirenge ku ihohotera rishingiye ku gitsina rikorerwa mu kazi.
•Ibiganiro n’ibyiciro bitandukanye ku itegeko rigenga umuryango, itegeko rirengera umwana, ihame ry’uburinganire n’ubwuzuzanye n’uruhare rwa buri wese mu kuyashyira mu bikorwa
•Ibiganiro n’abangavu bahohotewe bakabyara imburagihe cyangwa batwite no kubaha serivisi zitandukanye
•Ibiganiro n’ababyeyi ku nshingano zabo zo kwita ku mwana, kumurengera no kumurinda
•Ibiganiro mu itangazamakuru bigaruka ku ruhare rw’abaturage n’abafatanyabikorwa muri iki cyumweru. 
•Kwegereza abahohotewe serivisi zitangwa na ISANGE ONE STOP CENTER 
•Gukemura ibindi bibazo bibangamiye iterambere ry’umuryango

Ubuhamya bw’imiryango
Umuryango wa Mudaheranwa na Niyonsaba Florence, wari umaze imyaka 23 ubana mu buryo butemewe n’amategeko, watanze ubuhamya bw’uko wavuye mu makimbirane nyuma yo kwigishwa, ndetse ufata icyemezo cyo kubana mu buryo bwemewe n’amategeko.

Mudaheranwa na Niyonsaba bafashe icyemezo cyo gusezerana nyuma y'imyaka 23 

Umugenzuzi Mukuru w’Uburinganire, Madamu Umutoni Gatsinzi Nadine, yasabye imiryango yasezeranye kuba intangarugero mu rukundo no mu mibanire itarangwamo amakimbirane, anibutsa urubyiruko kwirinda kubana mu buryo butemewe n’amategeko, ahubwo buri wese agahitamo inzira nziza yo gushaka uko amategeko abiteganya.

Umugenzuzi Mukuru w'Uburinganire Umutoni Gatsinzi Nadine yageneye ubutumwa iimiryango yasezeranye.
Guverineri Pudence Rubingisa wasoje iyi nteko y’abaturage yashimye imiryango 47 yasezeranye, ayisaba kuzirikana ko ihame ry’uburinganire ari inkingi y’imiyoborere myiza n’iterambere rihereye mu rugo. Yibukije ko nta muryango wumvikana wagira ubukene, kuko ubwumvikane ari isoko y’iterambere rirambye.

Guverineri w'Intara y'Iburasirazuba bwana Pudence Rubingisa mu Nteko y'Abaturage.

Ibikorwa byo kwimakaza ihame ry’uburinganire byatangiye mu mwaka wa 2017 mu Karere ka Rulindo hagamijwe kwegera  abaturage no gukemura ibibazo bitandukanye  byungarije umuryango. Uyu munsi ibi bikorwa bimaze kuba mu turere n’Intara bitandukanye mu gihugu  kandi byatanze umusaruro mu kwimikaza ihame ry’uburinganire no kurwanya ihohoterwa rishingiye ku gitsina.