Musanze, ku wa 23 Nzeri 2025, Minisitiri w’Uburinganire n’Iterambere ry’Umuryango, Consolee Uwimana, yifatanyije n’Umugenzuzi Mukuru w’Uburinganire, Nadine Umutoni, Guverineri w’Intara y’Amajyaruguru, Maurice Gahunde, ndetse n’Umuyobozi w’Akarere ka Musanze, Nsengimana Claudien, mu gikorwa cyo gutangiza Icyumweru cyahariwe kwimakaza ihame ry’Uburinganire (Gender Accountability Week).
Iki gikorwa cyabereye mu Murenge wa Cyuve, Akarere ka Musanze, cyitabirwa n’abaturage batandukanye ndetse n’abafatanyabikorwa b’Intara.

Ihame ry’Uburinganire: urugendo rwa buri wese
Mu ijambo rye, Umugenzuzi Mukuru w’Uburinganire, Nadine Umutoni, yibukije ko kwimakaza ihame ry’uburinganire ari urugendo rusaba uruhare rwa buri wese. Yashishikarije abaturage ba Musanze gukomeza kwimakaza ibiganiro mu miryango, gukemura ibibazo biyibangamiye, no gufatanya mu kubaka umuryango utekanye.

Umugenzuzi Mukuru w'Uburinganire Umutoni Gatsinzi Nadine

Umuyobozi w’Akarere ka Musanze, Nsengimana Claudien, yayoboye umuhango wo gusezeranya imiryango 35, yiyemeje kubana mu buryo bwemewe n’amategeko, yongerera imbaraga gahunda yo kwimakaza umuryango uhamye n’uburenganzira bw’umwana.

Imiryango 35 yasezeranye imbere y'amategeko  

Minisitiri w’Uburinganire n’Iterambere ry’Umuryango, Consolee Uwimana, yakomeje ibiganiro byibanze ku ngingo z’ingenzi zirimo kurwanya inda ziterwa abangavu, kurwanya igwingira mu bana, kubaka umuryango utekanye no kwimakaza ihame ry’uburinganire by’umwihariko rikubahirizwa mu muryango.

Inteko y'abaturage umwanya mwiza wo kuganira ku byateza imbere umuryango

 Iki Cyumwweru gifite insanganyamatsiko igira iti “Umuryango utekanye , Ishema ryanjye” gitenganyijwe kuva ku wa 23 Nzeri kugeza ku wa 02 Ukwakira 2025 mu turere twose tw'Intara y'Amajyaruguru.

Mu turere twose tugize Intara y’Amajyaruguru hateganyijwe ibikorwa bitandukanye birimo:
•Gusezeranya imiryango ibana itarasezeranye imbere y’amategeko.

Urwibutso ku basezeraniye Mu Karere ka Musanze.

•Ibiganiro n’abayobozi n’abakozi b’Uturere n’Imirenge ku ihohoterwa rishingiye ku gitsina rikorerwa mu kazi.
•Ibiganiro n’abangavu bahohotewe bakabyara imburagihe cyangwa batwite no kubaha serivisi z’inkunga.
•Ubugenzuzi ku mikorere ya Isange One Stop Center n’uruhare rw’abafatanyabikorwa mu gukumira no kurwanya ihohoterwa rishingiye ku gitsina.
•Kwandika abana mu bitabo by’irangamimerere.
•Ibiganiro n’inzego z’Inama y’Igihugu y’Abagore.
•Umuganda udasanzwe wo kubakira imiryango itishoboye itagira amacumbi.
•Ibiganiro mu itangazamakuru ku ruhare rw’abaturage n’abafatanyabikorwa mu kwimakaza ihame ry’uburinganire.

Ibirori byabashinze urugo birangwa no gusabana.

Iyi nteko y’abaturage yasojwe n’ubusabane hagati y’abayitabiriye, by’umwihariko imiryango mishya yasezeranye imbere y’amategeko, ishimangira ko kwimakaza uburinganire no kubaka umuryango uhamye ari igitekerezo gihurije hamwe abaturage, ubuyobozi n’abafatanyabikorwa.