Imiryango 675 yabanaga mu buryo butemewe n’amatageko yasezeranye imbere y’amategeko mu cyumweru cyahariwe kwimakaza ihame ry’uburinganire mu ntara y’amajyaruguru nka kimwe mu bikorwa byakozwe muri iki cyumweru.

Ibi byatangajwe mu nama nyunguranabitekerezo yabaye kuwa Kane, tariki ya 03 Nzeri 2024, Mu Karere ka Musanze ubwo hozwaga icyumweru cyahariwe ibikorwa byo kwimakaza ihame ry’uburinganire mu Ntara y’Amajyaruguru.

Abitabiriye iyi nama bashimiye umusaruro wabonetse muri iki Cyumweru bafata ingamba zo kwimakaza ihame ry'uburinganire.

Iyi nama yitabiriwe na Guverineri w’Intara y’Amajyaruguru MUGABOWAGAHUNDE Maurice, Umugenzuzi Mukuru wa Gender, Umutoni Gatsinzi Nadine, abayobozi b’Uturere tugize iyi Ntara, Abayobozi b’Uturere bungirije bashinzwe imibereho myiza y’abaturage bose ,abafatanyabikorwa batandukanye bagize uruhare muri iki cyumweru , inzego z’abikorera  n’umutekano.

Mu mu musaruro wagaragaye muri iki cyumweru, mu Ntara y’Amajyaruguru yose , hasezeranye imiryango 675 ,abangavu 1200 babyaye imburagihe baraganirijwe mu rwego rwo kubafasha gusubizwa mu buzima busanzwe no kubaba hafi. Muri iki cyumweru kandi abana 237 banditswe mu bitabo by'irangamimerere, abangavu 735 bahawe Serivisi z’Ubutabera n'ubuvuzimu gihe ibikorwa byakozwe mu muganda udasanzwe wari ugamije ku guteza imbere imirire myiza mu bana  ufite agaciro ka 148, 586,819 Frw.

Mu ijambo rye, Guverineri w’Intara y’Amajyaruguru Mugabowagahunde Maurice yashimye inzego zitandukanye z’uturere zagize uruhare muri iki Cyumweru. Yakomeje asaba abitabiriye ko ibikorwa byo kwimakaza ihame ry'uburinganire bitarangirana  cy’cyumweru ahubwo bigomba kuba ubuzima bwa buri munsi bw'umuturage.

“Nk’uko twabyemeranyije umwaka ushyize, ndasaba ko ibikorwa bya GAD byakwinjira mu igenamigambi ry’Uturere twose n’abafatanyabikorwa kugira ngo tuzajye tuyikora buri mezi atandatu kandi bitatugoye.” Umugenzuzi Mukuru wa w’Uburinganire Umutoni Gatsinzi aganira n’abitabiriye iyi nama.

Yakomeje ashimire Ubuyobozi bw’Uturere n’abakozi bose imbaraga bahaye ibikorwa bya  Gender Accountability Day  kandi byatumye  tubona umusaruro nko kwandika abana, gusezeranya imiryango ibana itarasezeranye, kurwanya ihohotera rishingiye ku gitsina, guteza imbere Imirire myiza, kuganiriza abangavu babyaye, gusuzuma ibibazo bafite no gushaka uburyo bwo kubikemura. Ibi bikorwa ni urugero rwiza rw’ibishoboka tukaba dukwiye guhora dukora nkabyo kugirango wa muturage uri ku Isonga agire ubuzima bwiza. 

Ibikorwa byo kwimakaza ihame ry’uburinganire byatangiye mu mwaka wa 2017 mu Karere ka Rulindo hagamijwe kwgera  abaturage no gukemura ibibazo bitandukanye  byungarije umuryango. Uyu munsi ibi bikorwa bimaze kuba mu turere n’Intara bitandukanye mu gihugu  kandi byatanze umusaruro mu kwimikaza ihame ry’uburinganire no kurwanya ihohoterwa rishingiye ku gitsina.