Imiryango 569 yabanaga mu buryo butemewe n’amatageko yasezeranye imbere y’amategeko mu cyumweru cyahariwe kwimakaza ihame ry’uburinganire mu ntara y’Iburengerazuba nka kimwe mu bikorwa byakozwe muri iki cyumweru.

Ibi byatangajwe mu nteko y’abaturage yabaye kuwa Kabiri, tariki ya 01 Mata 2025, Mu Karere ka Karonga,mu Murenge wa Bwishyura ahabereye ibirori byo gusoza iki cyumweru. Iyi nteko yabereyemo umuhango wo gusezeranya imiryango 17 yabanaga mu buryo butemewe n’amategeko. Iyi miryango yasabwe gukomeza kuba intagarugero aho ituye no gufasha guhindura imyumvire y’abaturanyi badashaka gusezerana n'ibindi bikorwa biteze imbere umuryango.

Iyi nteko yitabiriwe na Guverineri w’Intara y’Iburengerazuba NTIBITURA Jean Bosco, Umugenzuzi Mukuru wa Gender, Umutoni Gatsinzi Nadine, abayobozi b’Umuyobozi w’Akarere ka Karongi MUZUNGU Gerard,abafatanyabikorwa batandukanye bagize uruhare muri iki cyumweru, inzego z’abikorera  n’umutekano.

Uhereye ibumoso Ntibitura Jean Bosco , Guverineri w'Intara y'Iburengerazuba, Umutoni Gatsinzi Nadine Umugenzuzi Mukuru w'Uburinganire wa Gender Monitoring Office, Muzungu Gerard , Meya w'Akarere ka Karongi.

Mu mu musaruro wagaragaye muri iki cyumweru, mu Ntara y’Iburengerazuba yose, hasezeranye imiryango 569, abangavu 2,3187 babyaye imburagihe baraganirijwe mu rwego rwo kubafasha gusubizwa mu buzima busanzwe no kubaba hafi, muri bo 232 basubijwe mu ishuri, na 174 batanze ibirego muri RIB, Muri iki cyumweru kandi abana 666 banditswe mu bitabo by'irangamimerere. 

Asoza iyi nteko y'abaturage , Guverineri w’Intara y’Iburengerazuba Ntibitura Jean Bosco yasabye abaturage ba Karongi byumwihariko kuzirikana ko umuryango ariwo musingi w'igihugu bityo bakwiye kurinda icyawuhungabanya. 

“Dukomeze gukumira amakimbirane mu miryango, dukurikirane abana bata ishuri, abana basambanywa, imirire mibi n’igwingira ry’abana. Ibi nabyo birakwiye ko tubibona nka Human Security Issue! Bikwiye guhagurukirwa kubera ko biri mu bidindiza iterambere ry’igihugu twibukiranye ko iyo umuryango utekanye, urangwamo uburere buboneye ku bana, utera imbere bityo n’igihugu kigatera imbere.” Umugenzuzi Mukuru w’Uburinganire Umutoni Gatsinzi Nadine mu nteko isoza iki cyumweru. 

Umugenzuzi Mukuru w'Uburinganire Umutoni Gastinzi Nadine yibukije ko umuryango uzira amakimbire ariwo igihugu gikwiye kubakiraho.

Yibukije gushyiraho gahunda ihamye yo gufasha abangavu babyaye gusubira mu ishuri, kubakurikirana,kwita ku bana babo no kubaha serivisi zose nkenerwa nko kwandikwa mu bitabo by’irangamimerere kuko ari uburenganzira.

Ni ku nshuro ya Kabiri ibikorwa by’icyumweru cyo kwimakaza ihame ry’uburinganire (Gender Accountability Week) bibereye mu Ntara y’Iburengerazuba, ku nshuro ya mbere byabaye mu mwaka wa 2023 kandi byatanze umusaruro