Guverineri w’Intara y’Amajyepfo Kayitesi yasabye abayobozi n’abafatanyabikorwa batandukanye bakorera mu Ntara ayobora kudahagarika ibikorwa byimakaza ihame ry’uburinganire kubera ko icyumweru cyahariwe kwimakaza ihame ry’Uburinganire cyasojwe muri iyi ntara. 

Ibi yabibasabye kuri uyu wa Gatatu tariki ya 11 Ukuboza 2024 mu nama nyunguranabitekerezo igaruka ku musaruro w’iki cyumweru n’ingamba zo gukomeza kwimakaza uburinganire no gushyira umuturage ku Isonga. 

Guverineri Kayitesi Alice yasabye abitabiriye abayobozi n'abafatanyabikorwa gukomeza ibikorwa byimakaza ihame ry'uburinganire.

Iyi nama yabereye ku biro by’Intara y’Amajyepfo yitabiriwe n’Umugenzuzi Mukuru w’Uburinganire Umutoni Gatsinzi Nadine, abayobozi b’uturere twose tugize iyi Ntara , Abayobozi b’amashami y’imiyoborere myiza mu turere twose , uhagarariye abafatanyabikorwa muri buri karere  n’inzego z’umutekano.

Mu jambo rye Guverineri  w’Intara y’Amajepfo Kayitesi Alice yashimye abagize uruhare bose mu migendekere myiza y’iki cyumweru abasaba gukomeza ibi bikorwa. Yagize ati” dusoje ku mugaragaro icyumweru cyahariwe kwimakaza ihame ry’uburinganire mu Ntara yacu ariko ibikorwa byimakaza ihame ry’uburinganire ntibigomba guhagarara kuko ari ibikorwa bidufasha kubaka umuryango.”

Muri iyi nama habaye umwanya wo kugaragaza umusaruro wavuye mu cyumweru cyo kwimakaza ihame ry’uburinganire cyatangiye tariki 25-30 Ugushyingo 2024 mu turere twose tw’intara y’Amajyepfo. Mu byakozwe harimo ,Imiryango yasezeranye :730 ,abana banditswe mu bitabo by’irangamimerere: 2,431,abangavu babyariye iwabo baganirijwe , bamwe bahawe serivisi zitandukanye zirimo ubuvuzi ,isanamitima , ubutabera n’izindi:2,081 n’umuganda rusange udasanzwe wakozwe muri iki cyumweru  ufite agaciro ka miliyoni  263,601,103. 

 “Nk’uko Insanganyamatsiko ya GAD yavugaga “Twimakaze Ihame ry’uburinganire, dushyira Umuturage kw’isonga”. birakwiye ko abagabo, abagore, abana bacu b’abakobwa n’abahungu bitabwaho buri wese hashingiwe ku byo akenera kugirango igihugu kigere kw’iterambere cyifuza ntawe uhejwe.”

Umugenzuzi Mukuru w'Uburinganire Umutoni Gatsinzi Nadine yibukije inzego zitandukanye ko gushyira umuturage ku isonga ariryo terambere ry'Igihugu.

Abitabiriye iyi nama bagize umwanya wo kungurana ibitekerezo ku musaruro w’iki cyumweru no gufata ingamba zo gukomeza kwimakaza ihame ry’uburinganire no kurwanya ihohotera rishingiye ku gitsina.

Ibikorwa byo kwimakaza ihame ry’uburinganire byatangiye mu mwaka wa 2017 mu Karere ka Rulindo hagamijwe kwgera  abaturage no gukemura ibibazo bitandukanye  byungarije umuryango. Uyu munsi ibi bikorwa bimaze kuba mu turere n’Intara bitandukanye mu gihugu  kandi byatanze umusaruro mu kwimikaza ihame ry’uburinganire no kurwanya ihohoterwa rishingiye ku gitsina.