Kuwa Gatanu tariki ya 17 Mata 2027, mu Murenge wa Nyanza, Akarere ka Gisagara habereye ibirori byo gusoza Icyumweru cy’Uburinganire n’umuryango mu Ntara y’Amajyepfo, byitabiriwe n’abayobozi batandukanye barimo Florien Rurihose, Umugenzuzi Mukuru w’Uburinganire wungirije, Nshimiyimana Vedaste, Umunyamabanga Nshingwabikorwa w’Intara y’Amajyepfo , Rutaburingoga Jerome, Umuyobozi w’Akarere ka Gisagara inzego zishinzwe umutekano , abafatanyabikorwa n’abaturage b’imirenge itandukanye. 

Uhereye iburyo( RURIHOSE Florien , Umugenzuzi Mukuru w'Uburinganire Wungirije, Nshimiyimana Vedaste, Umunyamabanga Nshingwabikorwa w’Intara y’Amajyepfo , Rutaburingoga Jerome, Umuyobozi w’Akarere ka Gisagara na Dusabe Denise , Umuyobozi w'Akarere wungirije ushinzwe iterambere ry'imibereho myiza)

Mu ijambo rye, Umuyobozi w’Akarere ka Gisagara yagaragaje ko Icyumweru cy’Uburinganire cyabaye umwanya mwiza wo kwegera imiryango, kumva ibibazo byayo no kubikemura ku gihe. Yashimangiye ko ibi ari intambwe ikomeye mu kwimakaza uburinganire n’ubwuzuzanye mu miryango, ari na byo shingiro ry’iterambere rirambye.

Ubuhamya bwatanzwe n’Umuryango wa Habuhazi Jean de Dieu na Nidufasha Florence bwagaragaje impinduka nziza zituruka ku gusobanukirwa ihame ry’uburinganire n’ubwuzuzanye. Uyu muryango watangaje ko wavuye mu makimbirane ugatera imbere, unashishikariza indi miryango ikibana mu makimbirane kuyareka kuko adindiza iterambere ry’umuryango n’iry’igihugu muri rusange.

Umuryango wa Habuhazi Jean de Dieu na Nidufasha Florence wavuze ko nyuma yo gusobanukirwa ihame ry'uburinganire n'ubwuzuzanye witeje imbere uvuye mu makimbirane.

Muri ibi birori kandi, imiryango 17 yabanaga mu buryo butemewe n’amategeko yasezeranye ku mugaragaro, isabwa kubaka ingo zishingiye ku bwubahane, uburinganire n’ubwuzuzanye nk’ishingiro ry’imibereho myiza.
Mu ijambo rye, Florien Rurihose yashimangiye ko kwimakaza uburinganire n’ubwuzuzanye bisaba ubufatanye bwa buri wese, agaragaza ko ari inkingi y’iterambere rirambye n’imibereho myiza y’abaturage.

Ibi birori byasojwe n’ubusabane ndetse no gushyigikira imiryango itandukanye, mu rwego rwo gukomeza kuyifasha mu rugendo rw’iterambere no kubaka umuryango nyarwanda utekanye kandi utera imbere.Imiryango itandatu yagabiwe inka mu rwego rwo gushyigikira iterambere ryayo 
Ibikorwa by’icyumweru cy’uburinganire n’umuryango mu Ntara y’Amajyepfo gifite insanganyamatsiko igira iti” Twimakaze ihame ry’Uburinganire, twubaka umuryango ushoboye kandi utekanye”.