Guverineri w’Intara y’Amajyaruguru Mugabowagahunde Maurice yatangaje ko icyumweru cyo  kwimakaza ihame ry’uburinganire kizajya kiba inshuro ebyiri mu mwaka w’ingengo y’imari kuko umusaruro wacyo wivugira.

Ibi yabitangaje kuri uyu wa Kane tariki ya 02 Ukwakira 2025 , mu nama nyunguranabitekerezo yabereye mu Karere ka Musanze yahuje abayobozi batandukanye n’abafatanyabikorwa mu rwego rwo kugaruka ku bikorwa byakozwe mu Cyumweru cyahariwe kwimakaza ihame ry’uburinganire mu Ntara y’Amajyaruguru, cyari gifite insanganyamatsiko igira iti “Umuryango utekanye, Ishema ryanjye”.
Iyi nama yitabiriwe na Guverineri w’Intara y’Amajyaruguru, Mugabowagahunde Maurice, Umugenzuzi Mukuru w’Uburinganire, Umutoni Gatsinzi Nadine, Umunyamabanga Uhoraho muri Minisiteri y’Uburinganire n’Iterambere ry’Umuryango, Batamuliza Mireille, abayobozi b’uturere, inzego z’umutekano n’abandi bafatanyabikorwa batandukanye.Abayobozi b'Ubuturere  tw'Intara y'Amajyaruguru bitabiriye iyi nama 

Bimwe mu bikorwa byagezweho
•Imiryango 539 yasezeranye imbere y’amategeko.
•Abana banditswe 463  mu bitabo by’irangamimerere.
•Abangavu 833 babyaye imburagihe baganirijwe no banahabwa serivisi sitandukanye zibafasha gusubira mu buzima busanzwe.
•Abakozi 461 bitabiriye ibiganiro bigamije kurwanya ihohotera rikorerwa mu kazi.
Ubutumwa bwatanzwe

“Icyumweru cyahariwe kwimakaza ihame ry’uburinganire kizajya kiba kabiri mu mwaka, kugira ngo dukomeze gushimangira ibikorwa bigamije gukemura ibibazo byugarije imiryango, by’umwihariko ihohotera rishingiye ku gitsina. Dukomeje gusaba buri wese kugira uruhare mu kurwanya amakimbirane mu miryango, kurwanya ihohoterwa, guhashya imirire mibi no gufasha abangavu babyaye gusubira mu ishuri.” – Guverineri w’Intara y’Amajyaruguru, Mugabowagahunde Maurice

Guverineri w'Intara y'Amjyaruguru Mugabowagahunde

Umugenzuzi Mukuru w’Uburinganire, Umutoni Gatsinzi Nadine, yashimangiye ko kugira umuryango utekanye bisaba guhuriza hamwe imbaraga mu gukumira no kurwanya ihohotera, kunoza serivisi zihabwa abahohotewe no gushyira ihame ry’uburinganire mu mihigo y’inzego zose.

Umugenzuzi Mukuru wa Gender Umutoni Gatsinzi Nadine 

Umunyamabanga Uhoraho muri MIGEPROF, Batamuliza Mireille, yibukije ko ihame ry’uburinganire rigomba guhera mu muryango, kuko uburinganire hagati y’umugore n’umugabo ari urufunguzo rw’iterambere ry’umuryango n’igihugu.
Visi Meya w’Akarere ka Gakenke ushinzwe imibereho myiza, Uwamahoro Thérèse, yavuze ko hashyizweho “Ishuri ry’Umuryango” mu rwego rwo kurwanya amakimbirane no gufasha imiryango kwiteza imbere.
Ibikorwa byo kwimakaza ihame ry’uburinganire byatangiye mu mwaka wa 2017 mu Karere ka Rulindo hagamijwe kwegera  abaturage no gukemura ibibazo bitandukanye  byungarije umuryango. Uyu munsi ibi bikorwa bimaze kuba mu turere n’Intara bitandukanye mu gihugu  kandi byatanze umusaruro mu kwimikaza ihame ry’uburinganire no kurwanya ihohoterwa rishingiye ku gitsina.