Kigali kuwa 03 Ukuboza 202, Abayobozi b’inzego z’ibanze baturutse mu turere tugize Umujyi wa Kigali bateraniye mu cyumba cy'inama ku biro by’Umujyi wa Kigali mu biganiro bigamije kugaruka ku ruhare rwabo mu kwimakaza ihame ry’uburinganire no kurwanya ihohotera rishingiye ku gitsina.

Ibi biganiro byitabiriwe na Minisitiri w’Uburinganire n’Iterambere ry’Umuryango, Uwimana Consolée, Umuyobozi w’Umujyi wa Kigali, Dusengiyumva Samuel, Umugenzuzi Mukuru w’Uburinganire, Umutoni Gatsinzi Nadine, abayobozi b’imidugudu, abanyamabanga nshingwabikorwa b’imirenge n’utugari, ndetse n’abafatanyabikorwa batandukanye.

Mu butumwa bwe, Umugenzuzi Mukuru w’Uburinganire, Umutoni Gatsinzi Nadine, yibukije abayobozi b’imidugudu n’inzego z’ibanze ko bafite uruhare rukomeye mu kurandura ihohotera n’amakimbirane mu miryango. Yagize ati:

“U Rwanda rwahisemo kwimakaza ihame ry’uburinganire no kubaka umuryango uzira ihohotera rishingiye ku gitsina. Abayobozi, by’umwihariko abakuru b’imidugudu, mugomba kwegera abaturage no kuba ku isonga mu kubaka umuryango utekanye.”

Umugenzuzi Mukuru w'Uburinganire Umutoni Gatsinzi Nadine 

Abitabiriye ibiganiro bahawe ibiganiro birimo kurwanya ihohotera rishingiye ku gitsina n’icuruzwa ry’abantu, ndetse banerekwa uko amakimbirane mu miryango akurura ibyaha byibasira umuryango. Basabwe kongera ubushake n’ingufu mu gukumira ibi byaha, no kwimakaza umuco w’amahoro n’ituze aho bayobora. Umujyi wa Kigali wasangije abayobozi ingamba watangiye gushyira mu bikorwa mu kurwanya ihohotera, zirimo gukangurira abaturage gutangira amakuru ku gihe, gushyigikira abafashwe n’ihohotera no kurushaho kunoza ubufatanye hagati y’inzego zitandukanye.

Mu kungurana ibitekerezo, abayobozi b’inzego z’ibanze bagarutse ku bunararibonye bwahoze buboneka mu midugudu yabo, bahiga ingamba nshya zo kurwanya ihohotera n’amakimbirane, kurwanya icuruzwa ry’abantu no guteza imbere imibanire myiza mu miryango.

Abayobozi b'inzego z'ibanze mu mujyi wa Kigali bagize umwanya wo kuganira

Umukuru w’Umudugudu wa Gakoma, Akagari ka Rwisirabo, Umurenge wa Karangazi mu Karere ka Nyagatare, Sabithi John Bosco, yagaragaje uburyo abaturage bafashijwe kugira ngo bagire umudugudu utarangwamo icyaha. Yibukije bagenzi be ko ubushake bw’umuyobozi ari bwo shingiro ry’umudugudu utekanye.

Mu gusoza, Minisitiri w’Uburinganire n’Iterambere ry’Umuryango, Uwimana Consolée, yashimangiye ko kurwanya ihohotera ari inshingano z’abayobozi bose. Yabasabye gukomeza kwegera abaturage, gukumira amakimbirane no kurushaho kwimakaza uburinganire mu miryango. Yagize ati: “Twese dufatanye kubaka umuryango utekanye, ushoboye kandi uharanira uburinganire.”

Minisitiri w'Uburinganire n'Iterambere ry'Umuryango 

Ibi biganiro ni kimwe mu bikorwa biri gukorwa hirya no hino mu gihugu mu rwego rwo kwimakaza uburinganire, kurwanya ihohotera no kubaka umuryango utekanye.